اعترفت الفنانة ريم البارودي إنها لا يمكن ان تكون صديقة سمية الخشاب (التي خطفت زوجها السابق احمد سعد) لأنها تختلف عنها تربية وسنا واخلاقا وتعليما! وأضافت عنها:"هي ليست اسم كبير في عالم الفن". واعترفت أنها حذفت صورها في انستجرام، مع زوجها السابق الفنان أحمد سعد بعد زواجه من الممثلة سُمية الخشاب، استجابةً لمتابعيها وبسبب زواجه قائلة: "مسحتها عشان ما يصحش يعني.. لكنها عمرها ما هتتمسح من جوجل"!.
وأضافت البارودي، خلال حوارها في لقاء حديث مع الإعلامية سارة دندراوي، أنها لم تقُل مسبقًا إنها صديقة سمية الخشاب، موضحةً: "أنا ما قولتش كده خالص لأن لا سنًا ولا تعليمًا ولا تربيةً ولا أي حاجة تجمعنا عشان نبقى صحاب". وتابعت: أنا اشتغلت مع سُمية في مسلسل واحد بس وهو (حدائق الشيطان)، وأنا مش محتاجة شُهرة، ولا محتاجة إني أقول إني صاحبتها لأنها اسم مش كبير، لكن عندي أسامي تانية كبيرة جدًا أصدقائي، مش محتاجة خالص ادعي صداقتها.
وواصلت: "لازم الصحاب يكونوا متقاربين في كل حاجة، لكن معلش يعني دي ما دخلتش المدارس اللي أنا دخلتها، ومش نفس الكلية، ومش نفس الطريقة، وأنا صاحبتي لازم تبقى شبهي". واستكملت: "سُمية مش نجمة خالص، السوق اللي بيحكم ويقول مين نجم ومين مش نجم، النجومية هي إنك تحافظي عليها زي عادل إمام وعمرو دياب ومنى زكي وغادة عبد الرازق، النجومية مش لقب، النجومية مسئولية، وأنا عمري ما قولت على نفسي نجمة الناس هي اللي بتقول"
وكانت الفنانة سمية الخشاب، ذكرت في لقاء تلفزيوني مؤخرًا، أنها لم تجمعها صداقة بالفنانة ريم البارودي قبل زواجها بالفنان أحمد سعد، مضيفةً: "عمري ما كنت صاحبة وصديقة لحد في الوسط الفني، لم أكن صديقة ريم أبدًا، ولما تزوجت أحمد سعد طلعنا على الهواء والمأذون بيكتب الكتاب منعًا لللغط، وأنا ما خدتش واحد من مراته".
تعليقات الزوار | اضف تعليق
